Monday, May 23, 2011

مجلسنا يا مجلسنا!!


حد فاكر يوم 28 يناير اول عربية جيش نزلت؟؟ انا عمرى ما هنسى منظر الناس و هما بيجروا على الظباط و العساكر يبوسوهم و هما فرحانين بيهم ساعتها حسيت إن ده جيشنا إحنا, بتاعنا إحنا, ملكنا إحنا و هيحمينا و يحمى ثورتنا. ده كان أول كام يوم فى التحرير.

لكن يوم الأربعاء بالتحديد موقعة الجمل اما كان البلطجية داخلين التحرير, قلت بس كدا الجيش هيمسك الناس ديه ينفضهم و مافيش ولا واحد من الثوار هيتلمس, لكن للأسف وقف يتفرج و الناس بتموت قدام عينيهم و المفرود إنهم يعنى بيحموا الثورة و الثوار.
سيبنا من موقعة الجمل ممكن مثلا الجيش كان عايز يوقف محايد عشان مايبنش متحيز لناحية معينة.
نيجى ليوم تانى, 25 فبراير كان مبارك خلاص غار فى داهية بس كان بواقى النظام موجودين الناس نزلت التحرير و قررت إنها تعتصم و الموضوع كان ماشى كويس أوى لحد وقت الحظر, إبندت الشرطة العسكرية تنزل الميدان و فجأة هتك يا ضرب فى الناس و قالك رصيدنا لديكم يسمح, ماشى يا عم هنعديها.

يتقرر نفس الموقف يوم 9 مارس و 9 و 12 أبريل و كمان كان فى إعتقلات بالجملة للثوار و تعذيب و ملفات أداب للبنات.
هنعديها بردو مأنتم رصيدكم يسمح بقى, شكلكم كدا خط مفتوح و إحنا مش عارفين.
نيجي لموضوع الإنفلات الأمنى, بيقوللك إن الشرطة بعافية شوية هاهاهاها لا يا راجل بعافية إزاى يعنى؟؟؟ أمال مين الضربنى عند السفارة؟؟

ما هو الموضوع ده له تفسير من الإتنين دول:


الشرطة فعلا بعافية و الكان بيضربنا ده العسكر * 

* الشرطة زى الفل بس مجلسنا مش عايزها تنزل


حد شايفلها تفسير تانى؟؟؟


طيب نيجى لنقطة تانية, مش المفرود بعد الثورة يتم محاكمة مبارك و ولاده و الشلة بتاعت الوطنى ديه؟؟ سانوا دول و جايين يمسكو فى الشباب البتتظاهر عشان قضية و يقوللك دول بلطجية و مندسين, هو مش مبارك كان بيقول كدا بردو ياجدعان ولا إيه, أمال الثورة عملت إيه بقى؟؟


انا مش ضد الجيش كمؤسسة انا ضد دكتاتورية المجلس و لو كان كلامى ده غلط ياريت يقولولنا هما بيعملوا كدا ليه و يقلولنا كدا حققنا إيه من أهداف الثورة بعد خلع مبارك

No comments:

Post a Comment