Friday, May 6, 2011

جامعة النيل - سؤال وجواب (بالبلدى وم الآخر) - الحقائق والمشكلة والمطلوب

 نعرض لكم فى السطور التالية الحقائق والمشكلة والمطلوب بخصوص جامعة النيل
نخش فى الموضوع على طول
ونبدأ بالسؤال الأشهر على الإطلاق



<<<<<<<<<<<<<<<<<<<<   حقائق عن جامعة النيل   >>>>>>>>>>>>>>>>>>>>

هى مش جامعة النيل دى بتاعت نظيف؟
 لا يا حضرت دى جامعة أهلية مبنية من تبرعات الأهالى ورجال الأعمال ومش بتاعت حد

يعنى إيه مش بتاعت حد؟
يعنى أسستها جمعية أهلية لتكون جامعة بحثية أهلية والجامعة الأهلية بالتعريف لا يستفيد منها ماديا أى شخص أو جهة. جامعة النيل بتاعت مصر

يعنى إيه جامعة أهلية بالظبط بالظبط؟
جامعة أهلية يعنى جامعة لا تهدف للربح، كل الأرباح يتم ضخها مرة أخرى داخل الجامعة 

أمال إيه علاقة أحمد نظيف بجامعة النيل؟
جامعة النيل بدأت كأحد مشاريع وزارة الإتصالات وقت ما كان د. أحمد نظيف وزير الإتصالات، ووزارة الإتصالات هى الوزارة الوحيدة المصرح لها بإنشاء مشاريع. د.أحمد نظيف لا يتدخل إطلاقا فى إدارة الجامعة ولا يتواجد بها. أنا بقالى هنا فى الجامعة أكتر من سنة ما شفتوش يعنى

بس جامعة النيل مصاريفها خيالية زى الجامعات الخاصة وميقدرش يدخلها غير "الصفوة" من أبناء الأغنياء
فعلا الجامعة لا تقبل غير الصفوة من العقول وليس من الأغنياء. الكثيــــــــــر (بجد مش واحد ولا أتنين ولا ٥ ولا ١٠) من طلبة الدراسات العليا بجامعة النيل يحصلون على منح كاملة أو جزئية من ٤٠ إلى ١٠٠٪. هذا العام قدمت الجامعة أكتر من ١٠٠ منحة للمتميزين

حلو موضوع المنح ده.. احكيلى أكتر
المنح الكاملة تقدم معها الجامعة فرصة عمل بمراكز البحث العلمى بالجامعة اللى نجحت فى جذب علماء وأساتذة مصريون يعملون بأرقى الجامعات فى أوروبا وأمريكا أنهم يرجعوا مصر ويعملوا بمراكز مهيئة مع طلبة من المتميزين علميا. جامعة النيل فيها أوائل جامعات القاهرة والأسكندرية والمنصورة والفيوم وحلوان والأزهر وغيرها... خلال ٤ سنوات تم نشر أكتر من ٢٥٠ بحث علمى مع طلبة الدراسات العليا فى جامعة النيل




<<<<<<<<<<<<<<<<<<<<  مشكلة جامعة النيـــل  >>>>>>>>>>>>>>>>>>>

مـــــــاشى.. فيـــــــــــن المشــــــكـلة؟
 جامعة النيل فى أزمة عشان فجأة بقت من غير حرم جامعى 

ليه؟
  عشان الفريق أحمد شفيق أصدر قرار بسحب الأرض والمبانى و وضعهم تحت تصرف صندوق تطوير التعليم (وده فى حد ذاته مش شئ وحش بس كان ينقل الكيان الأكاديمى معاهم) وبعدين ساب منصبه ولحد الآن العاملين والطلاب والأساتذة ملهومش أنهم يدخلوا معاملهم

والأرض بتاعت مين؟
الأرض ملك الدولة وكان للجامعة فيها حق إنتفاع على أن تدفع إيجار، يعنى الجامعة عمرها ما كانت هتتملك الأرض

 وصندوق تطوير التعليم هيعمل إيه بالأرض والمبانى اللى كانت مجهزة للجامعة؟
 الله أعلم

لأ بجد؟
بجد الله أعلم، آخر كلام أنا سمعته وزير التعليم العالى والبحث العلمى د. عمرو سلامة قال فى التليفزيون أن من واجبه الحفاظ على جامعة النيل (الله يفتح عليك يا دكتور) وأشاد بالجامعة والبحث العلمى، كما وصفها حاتم البلك أمين مجلس الجامعات الخاصة والأهلية بالكيان الجميل وقال أن وزارة التعليم العالى لن تسمح بهدم جامعة النيل "وسوف نبذل كل مانستطيع ليبقى هذا الكيان الجميل المسمى بجامعة النيل" لكن لم يعلن دكتور عمرو سلامة عن أى حل لمشكلة جامعة النيل الردود كانت فى سياق انهم يدعمون الجامعة و هيفكروا ويدرسوا وربنا يسهل وكدة وبتاع

يمكن يدوها ﻷحمد زويل؟
المتحدث الإعلامى للدكتور أحمد زويل (أحمد المسلمانى) أوضح فى برنامجه الطبعة الأولى أن أحمد زويل مش عايز الأرض و أكد دعمه للجامعة قائلا: جامعة النيل جامعة مصرية ملك للمصريين على أرض مصرية فيها طلاب وأساتذة وخبراء مصريين على أعلى مستوى. وفى حلقة أخرى: هذه الجامعة فكرة عظيمة، قام عليها علماء أجلاء، الجامعة وما فيها كلها ملك للدولة المصرية





<<<<<<<<<<<<<<<<<<<<  المطلوب وأشارك إزاى  >>>>>>>>>>>>>>>>>>>>

المطلوب سرعة تمكين طلبة وباحثى جامعة النيل من المعامل والحرم الجامعى المجهز لهم فى الشيخ زايد


لو عايز تدعم جامعة النيل شارك بإسمك فى حملة جمع التوقيعات على الرابط ده
لو عايز تتابع تطورات القضية تابع صفحتنا على الفيسبوك
من هبه شلبى باحثة فى جامعة النيل

No comments:

Post a Comment